StA MR Best. M1 Nr. 725, fol. 62r

Catharina N. an Hans Alt, Schmalkalden, 18. Juli 1625, Abschrift

Mein freundliche vndt gantz willige dienst zuuor, hertzallerliebster vertrawter Jch habe vermeint ihr hettet Jhr hettet meiner vndt ewers kindes gantz vnd gar vergeßen, do ich auch das schreiben welchs ihr gevatter Catharin geschickt, habe horen lesen vnd ewern zustandt vnd gesundtheit vernommen bin ich herzlichen erfrewet worden, meine vnd ewers kindes gesundtheit belangendt, sindt wir zwar Gott lob vnd danck noch alle frisch vnd gesundt, aber von Jederman |: wie ihr könt dencken  nicht allein zu Schmalkalden sondern auch zu Wasungen veracht vnd vnwerth gehalten, vnd wan ich schon zu Wasungen bei meiner mutter gern sein möchte So hat mir die Obrigkeit alda vorgehalten vnd vfferlegt, wan ich vnd das kindt vnseren vffenthalt daselbst wolten haben soll ich den herren 20 reichsthaler geben welches mir dan vnmuglich ist, derentwegen ich mich mit dem kindt gar redlich behelffen muß, weil ich nicht viel mehr zum besten habe, ich vnd das kindt das clare waßer trinken mußen, bin der tröstlichen hoffnung vnd zuversicht wie ihr dan in iezigen schreiben vermeldet ihr werdet ewer zusage nachkommen vnd mich ehistes tags zur kirchen fuhren, mich auch nicht also gantz im elendt stecken laßen, Ihr meldet auch daß ich keinen mangel leiden solle, wo soll ichs aber nehmen, derentwegen wollet ihr mir bei sonderlicher vnd ehister gelegenheit etwas von geltt hieher schicken vnd wan das selbige an goltt were, konte es besto beßer fortgebracht werden, Mit dem Bürgerrecht zu Wasungen daß ich den herrn daselbst 20 Reichsthaler geben, will ichs mit demselbigen noch ein weil laßen anstehe biß ihr selbsten hieher kombt vnderdesen will ich mich bei der gevatter Catharin Merckelin ein 14 Tage vffhalten biß der Bott von euch wieder hieher kompt, wollet mir wieder schreiben, wie ich mich mit demselbigen verhalten solle, nicht mehr vffs dießmahl dan seit Gott dem allmechtigen beuohlen, Ich vnd ewer vnmundiges kindt wunschen euch viel hundert tausend guter nacht, Datum Schmalkalden am 18ten Julij Anno 1625.

Ewer liebe vertrawte

Catharina daselbst.