StA MR Best. M1 Nr. 725, fol. 65r

N.N. an Hans Merdten, s.l., s.d., Abschrift

Mein hertzallerliebster dausentschatz Hanß Merdten Jch wünsch Euch soviel hundert tausent guter nacht, alß sternlein am himmell stehen zwüschen mir vndt Euch, Vndt soll Euch so viell hundert tausent guter nacht sagen von meiner schwester Osanna, Vndt sie sagt so, Jhr solt ihr auch gedenkhen, Vndt es vergehet kein stundt, Sie gedenckt an Euch, Vndt soll Euch viel gutes sagen von all meinen geschwistern Vatter vndt Mutter alle zumahlen Mein liebster Hanß Merdten, den haarzopff den ihr mir geschickt habt, den hab ich eingenehet mit goltfarber seiden vndt trag ihn vmb mein rechten armb, Vndt daß ich sonst kein ander kurtzweill habe alß mit ewerm hundt, wen er gedenckt, das es will abendt werden, so läufft er in unße Kammer vndt leget sich vnter mein bett vnten zun heupten, Wen es tag wird, so lest er nicht nach biß wir aufstehen, Mein hertzallerliebster schatz ich bitte Euch gantz demütig vmb Gottes willen, ihr wollett mir doch etwas schickhen, Vndt wir müßen alle stunde hören von den Bürgern, ihr hettet mir 5 vngrisch fl.[1] geschickt, Vndt so bitte ich Euch gantz demütig ihr wollett mir doch was schickhen, mir, vndt meiner Schwester etwas besonderlich.

---

[1]florenus: Gulden, Währungseinheit