StA MR Best. M1 Nr. 725, fol. 60r

Jacob Zielfelder an Petter Hooschar, Schmalkalden, 20. Juli 1625, Abschrift

Mit wunschung alles guten Jederzeit zuuor, freundlicher lieber herr Schwager vnd Gevatter, wan ihr noch frisch vnd gesundt weret, were mir daßelbige hertzlich lieb zue horen, vnß alle belanget dancken wir dem lieben Gott der wolle vnß weiter frisch vnd gesundt nach Gottes willen zusamen verhelffen Euch vnd ewer liebe haußfrawen hat der liebe Gott ein schönes Junges dochterlein bescheret, welches durch meine liebe dochter Catharina ist zur heiligen tauff getragen worden vnd mit dem Nahmen Anna Catharina genennet welchem der liebe Gott auch seinen gotlichen Segen geben wollen, eß hat mir der herr gevatter geschrieben daß ich uff meine liebe baaße vnd gevatterin gute auffsicht geben wolle, soll daßelbige von mir wohl in gute achtung gescheen das ihr von niemandts nichts vnbilliges wiederfahren solle sie helt sich bei der Mutter ihm hauß gantz still vnd eingezogen, wan ihr weret bei vns geweßen so hettet ihr gesehen wie wir vff der tauff so frolich vnd ewer gesuntheit einer dem andern zue getruncken, Euch leßet freundlich grußen meine liebe hausfraw vnd alle meine kinder, vnd wünschen daß der herr Schwager vnd gevatter wie der frisch vnd gesundt bei vnß gelangen möchte ist auch mein freundliches bitten ihr wollet mir Hanß Friederichen Colzen fleißig gruß Stechmilli auch ewern bruder Henrichen vnd alle  gute bekanden geben in Schmalkalden den 20ten July Anno p 1625.

E. W. G. G.

Jacob Zielfelder

Burger daselbsten